ဂက်စ်ပိုက်လိုင်းလျော်ကြေးငွေ လက်မခံသည့် သျှမ်းပြည် (မြောက်ပိုင်း) နမ့်ခမ်းမြို့နယ် မိုင်းဝီးကျေးရွာရှိ တောင် သူများကို စွမ်းအင်ဦးစီးအရာရှိ ဦးမျိုးမြင့်အောင်မှ ယခုလ ၁၃ ရက်နေ့ ည ရ နာရီခန့်တွင် ခေါ်ယူကြိမ်းမောင်းခဲ့ကြောင်း သိရသည်။
ရခိုင်ပြည်နယ် ကျောက်ဖြူမြို့မှ တရုတ်နိုင်ငံအထိ ဂက်စ်ပိုက်လိုင်းသွယ်သန်းရာတွင် မြေသိမ်းခံရသည့် မိုင်းဝီးရွာခံ တောင်သူများကို စွမ်းအင်နှင့်မြေစာရင်းဦးစီးအရာရှိများက သဘောတူကြောင်း လက်မှတ်ထိုးခိုင်းရာ လက်မှတ်မထိုး သည့် တောင် သူ ၈ ဦးခန့် ကျန်ရှိပြီး အဆိုပါတောင်သူများအား ခေါ်ယူကြိမ်းမောင်းခြင်း ဖြစ်ကြောင်း သိရသည်။
မရှင်းလင်းသည်များကို မေးမြန်းဆွေးနွေးနိုင်ရန်ဟု ဆိုကာ တောင်သူများကို မိုင်းဝီးရွာ ရယကစာရေး ဦးသန်းဦး နေအိမ်သို့ ခေါ်ယူခဲ့ကြောင်း မိုင်းဝီးရွာခံတောင်သူ တစ်ဦးက သျှမ်းသံတော်ဆင့်သို့ ပြောသည် ။
“လက်မှတ်မထိုးသေးတဲ့တောင်သူ ၈ ဦးလောက်ရှိသေးတယ် အားလုံးဦးရေက အယောက် ၁၀၀ လောက်ရှိတယ်။ အဲဒါကို လက်မှတ်မထိုးသေးတာကို မရှင်းလို့လားဆိုပြီး စွမ်းအင်အရာရှိ ဦးမျိုးမြင့်အောင် ၊ မြေစာရင်းဦးစီးမှူး ဦးကျော်နိုင်တို့က ခေါ်တာပေါ့ တောင်သူတွေကမေးမြန်းကြတဲ့ အခါကျတော့ အဆူခံရ ၊ ရန်ရှာခံရတာပေါ့ ” သူက ဆိုသည် ။
တောင်သူများက ၎င်းတို့၏ လယ်မြေများကို မည်သည့်အတန်းအစားတွင် ထည့်သွင်းထားသနည်းဟု မေးမြန်းရာတွင် စွမ်းအင်ဦးစီးအရာရှိမှ ရှင်းလင်းစွာဖြေဆိုခြင်း မရှိကြောင်း သိရသည်။
“တောင်သူတွေက သူတို့လယ်တွေကို ဒုတိယတန်းစားမှာ ထည့်မှာစိုးလို့ ဘယ်အတန်းအစားမှာ ထည့်သလဲလို့ မေးတော့ ဦးမျိုးမြင့်အောင်က ပြန်ဆဲဆိုဟိန်းဟောက်တယ် ” ဟု ဆိုသည်။
တစ်နှစ်အတွင်း စိုက်ပျိုးသည့် အကြိမ်အရေအတွက်ပေါ် မူတည်၍ သိမ်းယူခံရသည့် လယ်မြေများကို ပထမ ၊ ဒုတိယ နှင့် တတိယတန်းစား ဟူ၍ ခွဲခြားသတ်မှတ်ကာ လျှော်ကြေးငွေကို ပထမတန်းစား ကျပ်သိန်း ၃၀ ၊ ဒုတိယတန်းစား ကျပ် ၂၅ သိန်းနှင့် တတိယတန်းစား ၂၀ ပေးကြောင်း သိရသည် ။
တောင်သူများက မြေစာရင်းဋ္ဌာနမှ တိုင်းတာသည့် လယ်မြေအကျယ်အဝန်း မှန်ကန်မှုမရှိကြောင်း ပြောဆိုခဲ့ရာ မြေစာရင်း ဦးစီးအရာရှိ ဦးကျော်နိုင်မှ ဂရမ်မရှိသည့် မြေများဖြစ်၍ လျော်ကြေးအပြည့်မပေးနိုင်ကြောင်း ပြန်လည် ပြောဆိုခဲ့သည်ဟု ဆိုသည် ။
အဆိုပါမြေများမှာ မြေဂရမ်မရှိသော်လည်း ဘိုးစဉ်ဘောင်ဆက် လုပ်ကိုင်ခဲ့သည့် ဓါးမဦးချ မြေများဖြစ်ကြောင်း ဦးကျော်နိုင်မှတရား မဝင်သလို ခြိမ်းခြောက် ပြောဆိုနေကြောင်း အဆိုပါတောင်သူများက ဆိုသည်။
